Borondate politikoa aldarazi duen BORROKA KOLOSALA

Tolosako Kiroldegietako langileek 2023an egindako greba mugagabea sona handikoa izan da eskualde osoan. Hasieran, kiroldegia itxita mantentzea ezinezkoa zirudien, eta gehienez ere bizpahiru eguneko kontua izango zela uste zuten askok. Baina, azkenean, maiatzetik azarora arte luzatu zen greba, ia zazpi hilabete iraun zuelarik. Gainera, gatazka are luzeagoa izan da, 2020an hitzarmena iraungi zenetik akordio bat lortzeko borondatea agertu zuten arren, 2024ko azarora arte ez baitzen lan-hitzarmena sinatu. Prozesu osoa hobeto azaltzeko eta gatazka honen berezitasunak aztertzeko, kiroldegiko hiru langilerekin, bi ordezkarirekin, sektoreko ELA sindikatuko federazio eta eskualdeko arduradunekin egon gara solasean. Haien testigantzak baliatuta, borroka honek izan duen ibilbidea jaso eta balioa ematea izan da dokumentu honen helburua.