Estatuko ezkerreko Fundazio subiranistak Bartzelonan bildu ginen urte amaieran iritziak elkartrukatzeko

2017/02/22
burujabetzaCIEMEN.jpg
Oro har partaideak ados zeuden herrien burujabetza oinarritzat hartu behar dela alternatiba taxutzeko, hala neoliberalismo hegemonikoaren aurrean, nola xenofobiaren, eskuin muturaren eta faxismo agerpen desberdinen aurka. Globalizazio alternatibo baten beharra azaleratu behar da, ez estatuek eta kapitalismo neoliberal basatiak 90etako hamarkadatik hona bultzatu dutena; honen izendatzaile komuna edo DNA izan behar da solidaritatearen defentsa, justizia soziala, sexu- eta ugaltze-askatasunak, ingurumena, aniztasun kulturala eta herrien eskubide kolektiboak.

Gaiarekin lotura duten beste artikulu batzuk:
- Soberanismoa: Zein da abiapuntua?, Xabi Anza
- Maltzaga hil da, gora Maltzaga!, Unai Oñederra
- Gai Monografikoak 51: burujabetzara bidean
- Gai Monografikoak 50. IDENTITATEA, DEMOKRAZIA, ONGIZATEA...

Ciemen

Urte amaieran Bartzelonan lehenengo aldiz bildu ginen espainiar estatuko ezker nazionalen hainbat fundazio, Centre Internacional Escarré per a les Minories Ètniques i les Nacions (CIEMEN)ek gonbidatuta. Kataluniako erakunde honek nazioarteko elkartasuna lantzen du, eta dei egin zien beren burua ezker subiranistan kokatzen duten organizazio politiko eta sindikalei (hauek oso tradizio desberdinak dituztelarik: antikapitalismoa, sozialdemokrazia aurrerakoia, ekosozialismoa edota errepublikanismoa), estrainekoz iritziak elkartrukatzeko.

Topaketan parte hartu zuten Euskal Herriko Iratzar Fundazioak, Alkartasuna Fundazioak, EzkerraBerri Fundazioak, Manu Robles Arangiz Fundazioak eta Ipar Hegoa Fundazioak

Topaketan parte hartu zuten fundazio edota pentsamendu guneak hauek izan ziren: Kataluniako Fundació Josep Irla eta Quim Soler (CUP); Illes Balearseko Fundació Emili Darder eta Ateneu Pere Mascaró; País Valenciàko Fundació Nexe; Euskal Herriko Iratzar Fundazioa, Alkartasuna Fundazioa eta EzkerraBerri Fundazioa; Galizako Fundació Galiza Sempre eta Xosé Manuel Beiras y Raúl Asegurado (Anova), eta Aragoiko Fundación Gaspar Torrente eta Fundación Aragonesista 29 de junio. Halaber, sindikatuen fundazioak ere izan ziren partaide: Galizako Fundación Moncho Reboiras eta Euskal Herriko Manu Robles Arangiz Fundazioa eta Ipar Hegoa Fundazioa. Lehentasuna eman zitzaien lurralde bakoitzean pisu garrantzitsua duten eragile politiko eta sindikalei; halere, aintzat hartzen da espazio ideologiko hau are pluralagoa eta heterogeneoagoa dela.

Bileran parte hartu zuten organizazioek oso egoki iritzi zieten sortu ziren sinergiei. Gogoeta eta ideiak partekatzen jarraitzeko borondatea agerian geratu zen. Hain zuzen, harremanetan segi eta uda baino lehenago beste topaketa bat antolatzeko proposamena ere egin zen.

Dei egin zitzaien oraindik ere herri orok bere hautuak erabakitzeko eskubidea duela -estatu berriak osatzeko aukera barne, gehiengo sozialek hala nahi balute- uste ez duten ezker eta indar progresistei, eskubide honen alde egin dezatela, globalizazio neoliberalaren alternatiba eraikitzeko funtsezkoa baita

Oro har partaideak ados zeuden herrien burujabetza oinarritzat hartu behar dela alternatiba taxutzeko, hala neoliberalismo hegemonikoaren aurrean, nola xenofobiaren, eskuin muturaren eta faxismo agerpen desberdinen aurka. Globalizazio alternatibo baten beharra azaleratu behar da, ez estatuek eta kapitalismo neoliberal basatiak 90etako hamarkadatik hona bultzatu dutena; honen izendatzaile komuna edo DNA izan behar da solidaritatearen defentsa, justizia soziala, sexu- eta ugaltze-askatasunak, ingurumena, aniztasun kulturala eta herrien eskubide kolektiboak.

Hain zuzen, dei egin zitzaien oraindik ere herri orok bere hautuak erabakitzeko eskubidea duela -estatu berriak osatzeko aukera barne, gehiengo sozialek hala nahi balute- uste ez duten ezker eta indar progresistei, eskubide honen alde egin dezatela, globalizazio neoliberalaren alternatiba eraikitzeko funtsezkoa baita; hain zuzen, globalizazio horrek estatuak eta inork hautatu ez dituen nazioarteko eragileak elkartzen ditu herriak eta gehiengo sozialak azpiratzeko.

Azkenik, espainiar Estatua hautetsi katalanen aurka egiten ari den erasoa ikusirik, CIEMENek Bartzelonan bildutako organizazioek erabateko babesa eta elkartasuna adierazi zieten herri katalanari eta bere erakunde demokratikoei; hauek, espainiar gobernuaren jarrera itxia medio, alde bakarreko bideari ekin behar izan diote.