Su txikian: Jantoki pribatuetako sukaldaritzako sektorearen 25 urteko borroka

EAEko ikastetxe pribatuetako, erresidentzietako, ospitaleetako eta enpresa pribatuetako sukaldeetako ELAko langileek bi hamarkada baino gehiago behar izan dituzte sektoreko hitzarmena lortzeko. 5.000 langile baino gehiago daude feminizatutako sektore horretan, eta prekarietateari eta diskriminazioari aurre egiteko antolaketa lan handia egin behar izan dute sindikatuko kideek. Lantokiz lantoki, sukaldez sukalde. Baita negoziazio kolektiboaren estatalizazioari aurre egiteko ere. Borroka horien guztien kontakizuna da testu honetan jasotzen dena, zuzenean protagonistek eurek kontatuta.