Auzolanen hirugarren edizioak etxebizitzarako eskubidea aldarrikatuko du urriaren 31n, Baionan

Auzolanen hirugarren edizioak etxebizitzarako eskubidearen inguruko hausnarketa, aldarrikapena eta ospakizuna uztartuko ditu. Jardunaldia HLM, etxebizitza sozialetako maizterren ordezkarien hauteskundeei begirako abiapuntua izango da, eta Aldak azken lau urteetako agintaldian lortutako aurrerapausoak ezagutarazteko eta etorkizuneko erronkak mahai gainean jartzeko aukera eskainiko du.

Horretarako, egitarau zabala antolatu dute: hitzaldiak, animazioak, kontzertuak, Gau Beltzaren ospakizuna eta bingo erraldoia, besteak beste.

Etxebizitzaren auzia, Frantziako presidentetzarako hauteskundeen eztabaidan

Jardunaldia 10:30ean hasiko da, "Élire domicile: etxebizitza hurrengo presidentetzarako hauteskundeetan" izeneko hitzaldiarekin. Bertan, etxebizitzaren arazoari aurre egiteko politika publikoak eta datozen hauteskundeen testuinguruan etxebizitzak izango duen lekua aztertuko dituzte hainbat ordezkari politikok eta gizarte eragilek.

Hizlarien artean izango dira Iñaki Echaniz (PS) diputatua, alokairuen prezioak mugatzeko araudia beste bi urtez luzatzeko lege-proposamenaren sustatzailea; Jean-René Etchegaray (Renaissance), Baionako auzapeza; Alain Iriart (EH Bai), Euskal Hirigune Elkargoko lehendakaria; eta François Piquemal (LFI) diputatua, etxebizitza-politiketan aditua.

Halaber, Isabelle Rey-Lefebvre Le Monde egunkariko kazetari ohia eta Halte à la spéculation liburuaren egilea, eta Malika Peyraut Aldako bozeramailea izango dira, gizarte zibilaren ikuspegia eztabaidara eramateko.

Auzolanen hirugarren edizioak, beraz, etxebizitzarako eskubidearen aldeko mobilizazioa indartzeko eta etxebizitza sozialetako maizterren antolakuntzari ikusgarritasuna emateko topagune izan nahi du.