Azterketak 57: Soldatak apalago, enpresen mozkinek gora

2026/03/10
txostenak.jpeg
Soldatak ez dira handitu sortu den aberastasuna adina, 2008tik ekonomia %22,5 hazi bada ere, soldatak %2,9 besterik ez direlako handitu. Eta, ondorioz, aberastasunaren zati handiena enpresen eta kapitalaren esku geratu da eta herritarren arteko desberdintasunak areagotu. Errealitate horren azterketa egin du ELAko Azterketa Bulegoak, eta ‘Hazkunde ekonomikoa eta soldata geldialdia Hego Euskal Herrian’ txostenean jaso.

TXOSTENA DESKARGATU

Bertan aztertzen dira enpresen mozkinak, arrakalak eta soldaten araberako desberdinkerien mekanismoak, besteak beste. Esaterako, Espainiako lan erreformen ondorioz ez da soldataren galera berreskuratu, ezta ekonomian soldatek zuten pisua ere. Horren isla da honako datu hau: Hego Euskal Herriko biztanleriaren erdiak 25.582 eurotik beherako soldata zuen 2022an.

Arrakalari erreparatuta, egiturazko arazoa dela erakusten du txostenak: emakumeek gizonek baino %12,8 gutxiago irabazten dute EAEn eta %20,7 gutxiago Nafarroan. Langileen jatorriari erreparatuta, atzerrian jaiotakoek %36,9 gutxiago kobratzen dute EAEn eta %27,4 gutxiago Nafarroan. Eta aberatsenen eta pobreenen artean ere aldea nabarmena da, gero eta gehiago. Esaterako, soldata handiena duten pertsonen %10k lau aldiz gehiago irabazten dute soldatarik txikiena duten %10k baino.

Beraz, aberastasuna gero eta okerrago banatzen da, eta desberdinkeriak egituratu, mozkinak pilatzen diren honetan. Horren argazkia, datu askorekin, jasotzen du ELAko txostenak.