Alternatiben herriak nonahi sortzeko deialdia

Alarma guztiak piztu dira. Arazo klimatikoak gero eta sarriago gertatzen dira, eta min handiena Hegoaldeko biztanlerik pobreenei egiten diete, baina baita Iparrekoei ere: lehorteak, desertifikazioa, urtaroen ziklo nahasia, uholdeak, urakanak, tifoiak, basoetako suteak, urtzen ari diren glaziar eta bankisak... Ez ote dugu ezer egingo? Begira egongo gara planeta erretzen den bitartean?

Desafioa hor dago: negutegi efektua eragiten duten gasen isuria zeharo gutxitu behar da; muga arriskutsuak edo atzeraezinak ezin ditugu gainditu, klimaren berotzea eta krisiari dagokionez.

Gizateriaren historian ez da sekula honelako erronkarik izan: sistema klimatikoa goitik behera eta modu basatian hondatu da, denbora oso laburrean gainera.

Baina Alternatiba izan den ekitaldi eder honek esperantza eman behar digu: soluzioak badaude, eta horiek aplikatzen ari dira milaka elkarte, tokiko elkargo eta pertsona. Gainera, alternatiba horiek bizitzeko atseginagoa den gizarte bat eratzen dute, bizikidetza hobea duena, solidarioagoa, justizia eta gizalege handiagoarekin.

Hainbat errealitatek erakusten digu bidea: Laborarien nekazaritza, ekonomiaren berlokalizazioa, lurraldearen antolakuntza kontrolatua eta garraio guztia errepidez ez egiteko alternatibak, energia aurreztea, eko-habitata, finantzak mendean hartzea, produkzioaren birmoldaketa sozial eta ekologikoa, kontsumo arduratsua, lanaren eta ondasunen banaketa, elkarlaguntza, hondakinen murrizketa eta birziklapena, ondasun komunen babesa (esaterako ura, lurra edo basoak). Aldaketa klimatikoaren aurkako borrokak ez gaitu mugatzen; kontrara, bultzada handia ematen digu gizalegezko etorkizun bat eraikitzeko.

Haatik, gobernuek eta mundu honetako boteretsuek ez dute bide hori hautatu. Klimaren inguruko nazioarteko negoziazioak blokatu eta bidean galtzen dira. Multinazionalek eta lobby ekonomikoek berebiziko lana egiten dute alternatiba horiek gauza ez daitezen; izan ere, zalantzan egongo bailirateke beren irabaziak eta boterea.

Areago, sasi-irtenbideak inposatzen dituzte, ezertarako balio ez dutenak eta arriskutsuak: energia nuklearra, agro-erregaiak, OGM, konpentsazio mekanismoak, naturaren finantziarizazioa, geoingeniaritza, etab. Horiei esker eutsi egin nahi diote orain arteko ereduari: Iparrak eta planetako biztanlerik aberatsenek natura bereganatzen dute, aberastasunak metatu eta ingurumena suntsitzen dute, batez ere Hegoan.

Herritarren inplikazioa, biztanleen mobilizazioa eta gure etorkizuna geure esku hartzea behar-beharrezkoa da etengabe zabaltzen ari den zulatze hori geldiarazteko.  Guretako bakoitzaren konpromisoa, Stéphane Hesselek hain ozen eskatzen zuena, gaur lehentasuna dugu erronka klimatikoari aurre egiteko.

Klima egonkortzeko beharrezkoa izango da gure batasuna, adimen kolektiboa, solidaritatea eta justizia soziala lortzeko egarria, orain eta hemen aldaketak egiten hasteko gaitasuna, trantsizioa gerorako utzi gabe abiatzeko borondatea.

Herritarren inplikazioa, biztanleen mobilizazioa eta gure etorkizuna geure esku hartzea behar-beharrezkoa da etengabe zabaltzen ari den zulatze hori geldiarazteko

2015 urtearen buruan COP21 izango da, aldaketa klimatikoaren inguruko Nazio Batuen 21. konferentzia. Kopenhageko konferentzia sonatu hartatik sei urte igaro direlarik, COP21ak ere oihartzun bera izan beharko luke, izan ere, estatuburuek hitz eman baitute oraingoan aldaketa klimatikoaren aurkako borrokarako hitzarmen bat onartuko dutela, 2020an hasten den aldirako. Nazioarteko zientzialariek diotenez 2020an gure negutegi efektuko gasen isuria jaisten hasi behar da, okerrena gertatzea nahi ez badugu bederen.

Promes hauek haizeak eraman ez ditzan, Kopenhagen gertatu zen bezala, herritarroi eta biztanleoi dagokigu mobilizatzea eta lan egitea zinezko soluzioak ezar daitezen. Gainera, kontutan izan COP21 hori Parisen izango dela, Le Bourgeteko aireportuan.

Frantzia eta Europa mailan, beraz, herritar mobilizazioa, larrialdi klimatikoari eta justizia sozialari buruz, uneko lehentasunezko helburu bilakatzen da.

Alternatibaren arrakastak eta bere izaera federatzaileak, gaur Baionan bildu garen guztiok posible egin dugun alternatiben herri honek, erakusten digu Europa mailako herritar mobilizazioak nolakoak izan daitezkeen.

Europako hiri eta lurralde guztiei dei egiten diegu gaur bertan hasita antolatzen hasi daitezen aldaketa klimatikoari eta krisi sozial eta ekologikoari eman beharreko alternatiben herriak.

Batetik, agintariak interpelatu egin behar ditugu, klimari buruzko nazioarteko hitzarmen handi, eraginkor, bete beharreko eta bidezkorik gabe ondorioak dramatikoak izango baitira; bestetik, biztanleriari dei egin behar diogu lehenbailehen has dezaten beharrezkoa den iragaite sozial, energetiko eta ekologikoa, horrela saihestuko baitugu klimaren mekanismoak behin betiko hondatzeko aukera.

Beste helburu bat izango da klima babesten laguntzen duten guztiak bat egitea; babes hori batzuk era batera, besteak bestera, egiten dituzten alternatiba edo borrokei esker bermatzen da. Alternatibak Baionan egin duena nonahi egin daiteke, formato oso desberdinekin.

Hamar, ehun edota mila Alternatiba berri loratzeko, Deialdi hau heda dezagun gure inguruan. Aldaketako eragile kopururik handiena bil dezagun, Frantzia eta Europa guztian zehar nonahi sortu behar diren alternatiben herriak prestatzen hasteko, Pariseko COP21 izan arte.

Bat eginik eta erabakiz jokatzen badugu, lehia hau Iparrean zein Hegoan irabaz dezakegu. Guretzat eta gure ondoren datozen belaunaldientzat. Esan ahal dadin, gaur nahiz bihar: "oraindik beranduegi ez zelarik hasi ginen mugitzen!".