Baiona, trantsizioan dagoen herria, alternatibak dituen herria

Sabino Ormazabal / Bizi!ko kolaboratzailea

Tolosan Kilometroak ospatzearekin batera Baionan ere hitzordu interesgarri bat baitugu; bertara joateko gonbite berezia egin zaie, gainera, Hego Euskal Herriko biztanleei.

Hitzordu hori “Alternatiba” da, trantsizio herria, alternatiben herria.

Feria irekia. “Alternatiba”k mezu bat zabaldu nahi du: trantsizio energetiko bat dagoeneko hasi da, eta berotze klimatikoari aurre egiteko soluzioak badaude; zerbait egiteko unea da. Hortaz, urriaren 6an Baionan izango den ferian alternatiba praktiko hauek erakutsi eta azalduko dira, hainbat esperientzia, erakusketa, eztabaida eta musika saio izango delarik… bertan milaka pertsona eta taldek parte hartuko dute, herri eta eskualde desberdinetatik etorriak, ezaugarri jakin batekin: eguneroko bizimoduan era askotako hautuak entseatzen ari dira, eta dependentziari esparru autonomoa irabazten ari zaizkio.

Auzoko dendetan tokiko produktuak paratuko dituzte; janari ekologiko edo begetarianoa dastatzeko aukera izango da, eta trukerako postuak ere jarriko dira

Baionako zati handi bat trafikoarentzat itxita egongo da, eta azoka ireki gisa, oinezkoen esparru zabala adin guztietako jendearen esku egongo da. Gune bakoitzean antolatu diren jardunaldiez gainera, zirkuito guztian zehar eserleku eta aulkiak jarriko dira topagune, atseden hartzeko edo besterik gabe denbora pasatzeko leku izan daitezen. Auzoko dendetan tokiko produktuak paratuko dituzte; janari ekologiko edo begetarianoa dastatzeko aukera izango da, eta trukerako postuak ere jarriko dira. Eusko tokiko moneta erabiliko da (www.euskalmoneta.org).

Bestalde, “Alternatiba” herri-jai bat izango da: 200 artista, musikari, antzerki-talde, 200 erakusle, 100 hizlari... Gainera, haurrentzako gune handi bat ere prestatuko da, hainbat ekimen eta jarduerarekin. Stéphane Hesseli omenaldia egingo zaio ekitaldi nagusian.

Gune tematikoak. Alternatiben herrixkan hamabost gune izango dira ikusgai urriaren 6an. Guztiek ere argi adierazten dituzte ibilitako eta ekin beharreko bidean zein erronkari egin beharko zaion aurre: nekazaritza iraunkorra eta elikagaien subiranotasuna (EHLG), ekonomiaren berlokalizazioa (zirkuito laburrak, Euskoaren moduko tokiko monetak, Lurzaindia…), finantza etikoak (aurrezki sozialeko ereduak, Herrikoa…), ura ondasun komun gisa (edateko ura guztiontzat bermatzea…), ondasun komunak eta kultura, elkartruke solidarioak (tokiko ereduak: elkartrukea, berreskurapena, trukea, erabilera libre eta doakoa…), ekonomia iraunkorra (lanaren eta aberastasunaren banaketa, aztarna ekologikoa, ekonomiaren birmoldatze sozial eta ekologikoa…), kontsumo arduratsuan, berrerabilpena eta birziklapena (elkartruke eta konponketa guneak, tailerrak, zero zabor…), garraioa eta mugikortasuna (garraio publikoa, bizikleta, ibilgailu partekatuak…), ekoeraikuntza eta lurraldearen birgaitzea (hirigintza alternatiboa, zaharberritze termikoa…), energia (efizientzia energetikoa, energia berriztagarriak eta partekatuak…), klima eta nazioarteko egoera (negutegi-efektuko gasak murrizteko helburuak, zor eta aztarna ekologikoa... eta ingurumen-hezkuntza (haurrentzako gune bat…)

Nekazaritza iraunkorra eta elikagaien subiranotasuna (EHLG), ekonomiaren berlokalizazioa (zirkuito laburrak, Euskoaren moduko tokiko monetak, Lurzaindia…), finantza etikoak (aurrezki sozialeko ereduak, Herrikoa…), ura ondasun komun gisa (edateko ura guztiontzat bermatzea…), ondasun komunak eta kultura, elkartruke solidarioak...

Antolakuntza eredu bat. Bizi! mugimenduak lortu du oinarritik abiatuta batu daitekeen guztia batzea. Helburuak ongi azaldu ditu eta protagonismo zein sektarismorik gabe asmatu du pertsona eta talde oso desberdinentzako tokia egiten: bilera irekiak, lan-talde pluralak, funtzionamendu horizontala, autogestio kolektiboa... Ia ehun erakunde eta komunikabideren eta 500 bolondresen lankidetzari esker, posible izango da “Alternatiba” Lapurdiko hiriburuan gauzatzea.

Garaiotan ziurrenik zaila litzateke antzeko esperientziarik beste nonbait egitea. Beraz, ekarpen egokia da, eta ikasteko parada ematen digun jarraitu beharreko eredua.

Katea luzatzen ari da. Partxiseko fitxa mugitzean gertatzen den bezala, komeni da edozein ekimen sozialek ekintza, kanpaina edo ekitaldiren bat antolatzen duenean hurrengo urratsa ere gogoan izatea. Perspektibaz pentsatu eta aliantzak bilatzea. Hain zuzen, “Alternatibak” baditu. Herriko etxeetarako, eta lurralde-hauteskundeetarako lau hilabetera, Bizi!k txosten batzuk egin ditu hainbat gairen inguruan: hirigintza, mugikortasuna, energia, nekazaritza, kontsumo arduratsua... ehunka proposamen eta alternatiba biltzen dituelarik.

Baionako jai herrikoi honetan gai honi buruzko hitzaldiak izango dira, eta hauetara hautetsiak, hautagai izan daitezkeenak eta Administrazioko teknikariak gonbidatu dituzte. Partaideen zerrenda gero eta luzeagoa da, eguna hurbildu ahala; deialdiko tandem bizikletari bezala, eserleku gehiago gehitzen ari zaizkio. Tandema gero eta luzeagoa da: http://www.bizimugi.eu/eu.

Beraz, borroka hau ez da urriaren 6an bukatuko. Jarraipena izango du.